Ljósberi ársins 2007

Guðrún Jónsdóttir, félagsráðgjafi og talskona Stígamóta, var valin Ljósberi ársins 2007. Verðlaunin eru veitt fyrir áralanga, ötula og skelegga baráttu hennar gegn kynferðisofbeldi og klámvæðingu hér á landi í forsvari fyrir Stígamót. Þátttaka Guðrúnar í alþjóðlegu samstarfi margra baráttuhópa sem berjast gegn kynbundnu ofbeldi hefur vakið óskipta athygli og hún sýnt óskoraða forystu fyrir Íslands hönd, samkvæmt tilkynningu.

Að valinu stendur sérstakur samstarfshópur sem samanstendur af fulltrúum frá átta stofnunum Reykjavíkurborgar, ásamt fulltrúum frá lögreglunni í Reykjavík og lögreglunni í Kópavogi. Verðlaunin voru veitt við hátíðlega athöfn í vikunni en þetta er í sjötta sinn sem samstarfshópurinn velur Ljósbera.

Samstarfshópur um Ljósberann var stofnaður haustið 2001 og hefur það að leiðarljósi að styrkja heilbrigðan lífstíl barna og unglinga. Hópurinn hefur árlega valið ljósbera ársins, en hefur einnig staðið fyrir fundum og ýmsum verkefnum tengdum heilbrigðum lífsstíl barna og unglinga.

Guðrún Gunnarsdóttir fjölmiðla- og söngkona varð fyrst til að hljóta viðurkenninguna Ljósberi ársins árið 2002 fyrir afdráttarlausa afstöðu gegn klámvæðingu. Árið 2003 hlaut Sigríður Schram kennari og nemendur hennar þessa viðurkenningu fyrir faglega og afgerandi gagnrýni á notkun kynlífs við að auglýsa súkkulaði, þar sem auglýsingunni er meðal annars beint að börnum og unglingum.



Ljósberi ársins 2006     Gísli Hrafn Atlason, ráðskona karlahóps Femínistafélags Íslands
Ljósberi ársins 2005     Thelma Ásdísardóttir, baráttukona
Ljósberi ársins 2004     Gunnar Hersvein, heimspekingur og séra Toshiki Toma
Ljósberi ársins 2003     Sigríður Schram, kennari
Ljósberi ársins 2002     Guðrún Gunnarsdóttir, fjölmiðlakona