Ný jafnréttislög – hvar erum við stödd?

Á Miðvikudaginn 16. apríl verður haldið Jafnréttistorg Jafnréttisstofu og Háskólans á Akureyri og verða nýju jafnréttislögin til umfjöllunar. Kristín Ástgeirsdóttir,framkvæmdastýra Jafnréttisstofu, mun fjalla um hvernig jafnréttislögin hafa þróast á Íslandi frá því að fyrstu lögin voru sett árið 1976. Mun hún meðal annars skoða hvaða breytingar hafa átt sér stað á lögunum á þessum árum. Ingibjörg Elíasdóttir, lögfræðingur Jafnréttisstofu, mun kynna nýju jafnréttislögin, fjalla um helstu breytingar sem þeim fylgja og ræða hvaða áhrif þau geta haft á framtíð jafnréttismála.

Jafnréttistorgið hefst kl. 12:00.
Staðsetning er L 201 Sólborg, Háskólinn á Akureyri.

Kristín Ástgeirsdóttir er framkvæmdastýra Jafnréttisstofu og hefur unnið að jafnréttismálum um árabil. Hún sat á þingi fyrir Kvennalistann 1991-1999. Hún er MA í sagnfræði og fjallaði MA-ritgerð hennar um Ingibjörgu H. Bjarnason og íslenska kvennahreyfingu 1915-1930. Hún birti nýlega grein í Sögu (2:2005) um áhrif kvennaráðstefna Sameinuðu þjóðanna á Íslandi og grein um Katrínu Thoroddsen lækni (2007).

Ingibjörg Elíasdóttir er lögfræðingur Jafnréttisstofu og kennari við Háskólann á Akureyri. Hún er Cand.jur. frá HÍ og BA í fjölmiðlafræði frá Bandaríkjunum. Hún stundar núna MA nám í kynjafræði við HÍ.