Í dag, á Kvennafrídaginn þann 24.október, veitti Jafnréttisráð, ásamt ráðherra jafnréttismála, Eygló Harðardóttir sérstaka fjölmiðlaviðurkenningu í annað sinn. Fjölmiðlaviðurkenningu Jafnréttisráðs geta hlotið aðilar sem hafa skarað fram úr þegar kemur að umfjöllun um mál sem tengjast jafnrétti kynjanna.
Í ár eru veittar viðurkenningar þremur flokkunum:
a. RÚV hlýtur fjölmiðlaviðurkenningu Jafnréttisráðs 2016 fyrir metnaðarfullt jafnréttisátak til að jafna stöðu kynjanna í umfjöllun og meðal starfsfólks.
b. Kynjabilið hlýtur fjölmiðlaviðurkenningu Jafnréttisráðs 2016 fyrir nýstárlega og spennandi framsetningu á fréttum og upplýsingum um ójafnrétti kynjanna í samfélaginu.
c. Björg Einarsdóttir hlýtur fjölmiðlaviðurkenningu Jafnréttisráðs 2016 fyrir einstakt og óeigingjarnt starf við skrásetningu á sögu kvenna og umfjöllun um jafnréttismál.
Í haust var auglýst eftir tilnefningum í þremur flokkum: a) til fjölmiðils sem skarað hefur fram úr á sviði jafnréttismála, s.s. hvað varðar efnistök, umfjöllun og miðlun efnis, b) vegna þáttar, þáttaraðar, greinar eða annars afmarkaðs efnis þar sem jafnrétti er sérstakt viðfangsefni eða leiðarstef og c) til einstaklings sem með störfum sínum á fjölmiðli hefur unnið sérstaklega að jafnréttismálum.
Sérstök valnefnd starfaði í haust og var hún skipuð fulltrúum Jafnréttisráðs, Blaðamannafélags Íslands og Háskóla Íslands. Fríða Rós Valdimarsdóttir var fulltrúi Jafnréttisráðs, Arndís Þorgeirsdóttir var fulltrúi Blaðamannafélagi Íslands og Ragnar Karlsson var fulltrúi Háskóla Íslands.
Rökstuðningur valnefndar:
a. Fjölmiðill sem skarað hefur fram úr á sviði jafnréttismála, s.s. hvað varðar efnistök, umfjöllun og miðlun efnis.
Ríkisútvarpið
Ríkisútvarpið hlýtur viðurkenningu fyrir að hafa unnið markvisst að umbótum í jafnréttismálum. Gerðar hafa verið róttækar breytingar í framkvæmdastjórn stofnunarinnar með þeim árangri að þar sitja nú jafnmargar konur og karlar. Sama hefur verið gert í hópi millistjórnenda þar sem konur, sem áður voru í minnihluta, eru nú örlítið fleiri en karlarnir. Samhliða þessu hefur verið unnið að bættri samþættingu vinnu og einkalífs fyrir starfsfólk miðilsins.
Tekist hefur að ná jafnvægi í hópi umsjónarmanna sem birtast í sjónvarpi og heyrast í útvarpi. Að þessu leyti sker RÚV sig frá öðrum ljósvakamiðlum hér á landi. Kynjatalning viðmælenda með að markmiði að jafnvægi ríki á milli kvenna og karla til sóma. Ákvarðanir og áherslur í dagskrá bera einnig skýrt merki jafnréttisátaksins. RÚV hefur miklum skyldum að gegna sem fjölmiðill í almannaþjónustu – ekki einvörðungu við að spegla samfélagið hverju sinni heldur sem fjölmiðill sem tekur hlutverk sitt alvarlega og vill hafa áhrif til góðs.
b. Þáttur, þáttaraðir, greinar eða annað afmarkað efni þar sem jafnrétti er sérstakt viðfangsefni eða leiðarstef.
Kynjabilið
Kynjabilið hlýtur viðurkenningu fyrir að beina sjónum að kynjaójafnrétti með nýstárlegum og áhugaverðum hætti. Kynjabilið er annars vegar síða á
Facebook og hins vegar á
Twitter og hefur verið starfrækt síðan í mars 2015.
Kynjabilið beinir sjónum að því hvernig kynjahlutföll birtast í umfjöllun fjölmiðla. Vakin er athygli á fréttum þar sem hallar á annað kynið auk þess sem það fjallar um kynjahalla á ýmsum sviðum samfélagsins.
Aðstandendur Kynjabilsins standa vaktina með sóma og framlag þeirra nær til margra og vekur fólk til umhugsunar um hvar pottur er brotinn í jafnréttismálum. Þótt kynjabilið veiti ójafnrétti mikla eftirtekt þá er líka sagt frá því sem vel er gert í jafnréttismálum.
Kynjabilið er áhugaverður miðill sem setur fram þarft umfjöllunarefni með skýrum og aðgengilegum hætti.
c. Einstaklingur sem með störfum sínum á fjölmiðli hefur unnið sérstaklega að jafnréttismálum.
Björg Einarsdóttir
Björg Einarsdóttir hlýtur viðurkenningu fyrir umfjöllun um kvennasögu og jafnréttismál. Á árunum 1983 og 1984 sá Björg um röð útvarpsþátta undir yfirskriftinni „Úr ævi og starfi íslenskra kvenna“ sem fluttir voru í Ríkisútvarpinu. Þættirnir brutu blað í umfjöllun útvarps um málefni kvenna og tókst Björgu að draga fram í dagsljósið mikilsverðar staðreyndir í sögu kvenna á Íslandi.
Höfundaverk Bjargar er drjúgt. Af ritstörfum hennar ber hæst ritsafn í þremur bindum „Úr ævi og starfi íslenskra kvenna“, sem byggði á fyrrnefndum útvarpserindum. Auk bóka og ritsafna sem Björg hefur samið og ritstýrt liggja eftir hana fjölmargar greinar í blöðum og tímaritum, auk sjónvarpsþátta, um málefni íslenskra kvenna.
Björg var ötul liðskona og vann veigamikið starf fyrir kvennahreyfinguna á Íslandi svo áratugum skipti og átti sæti í stjórnum margra félaga og samtaka kvenna.