Fréttir

Jafnréttisstofa stóð fyrir málstofu  um átakið „Afnemum staðalímyndir kynjanna, leyfum hæfileikunum að njóta sín“ á hótel KEA fimmtudaginn 1. október sl. Málstofan  hófst með kynningu á átakinu sem er samstarfsverkefni 27 aðildarríkja Evrópusambandsins auk Noregs og Íslands. Haldnar eru málstofur í þessum löndum fyrir starfsmenn verslunarráða, viðskipta- og fagsamtaka, stjórnendur, mannauðsstjóra og alla sem áhuga hafa á málefninu. Átakið tekur einnig saman og veitir sérstök þjálfunarúrræði til að nýta betur og með skilvirkari hætti hæfileika einstakra starfsmanna innan fyrirtækja og stofnana.

Miðvikudaginn 7. október flytur Auður Styrkársdóttir erindi á jafnréttistorgi undir yfirskriftinni Kyn og völd. Torgið hefst kl. 12:00 í stofu L201

Föstudaginn 9. október fer fram doktorsvörn við stjórnmálafræðideild Háskóla Íslands. Þá ver Gyða Margrét Pétursdóttir félags- og kynjafræðingur doktorsritgerð sína ‘Within the Aura of Gender Equality: Icelandic work cultures, gender relations and family responsibility’ (Innan áru kynjajafnréttis: Vinnumenning, kynjatengsl og fjölskylduábyrgð).

Í fjármálafrumvarpinu fyrir árið 2010 er sérstakur kafli um kynjaða hagstjórn. Í honum kemur fram að það sé skýr stefna stjórnvalda að taka upp kynjasamþættingu við fjárlagagerð og að samþætta beri stefnu í jafnréttismálum og stefnu í efnahagsmálum.