Fréttir

Jafnréttisstofa vill vekja athygli á að með nýju frumvarpi félags- og húsnæðismálaráðherra um breytingar á lögum um almannatryggingar, fylgir sérstakt jafnréttismat. Jafnréttismatið er unnið í samræmi við innleiðingaráætlun um kynjaða hagstjórn og fjárlagagerð. Samkvæmt áætluninni skal jafnréttismeta 10% frumvarpa sem lögð eru fram í ár og á hlutfallið að vera komið upp í 100% frumvarpa árið 2019. 

Norrænaráðherranefndin gefur út  Jafnréttisvísa sem nú eru einnig aðgengilegir á íslensku. Jafnrétti kvenna og karla er grundvallargildi á Norðurlöndum. Kynjajafnrétti vísar til jafns réttar, jafnrar ábyrgðar og jafnra tækifæra á öllum sviðum lífsins fyrir konur og karla og stráka og stelpur. Það þýðir að allir einstaklingar – óháð kyni – hafa jafn mikil völd og áhrif í samfélaginu. Nauðsynlegt er að nota vísa og taka saman tölfræði sem endurspeglar líf kvenna og karla til að fylgjast með framförum á þessu sviði, til að takast á við vandamál og til að byggja stefnumótun og áætlanir á – en líka til að miðla þekkingu til almennings. Söfnun og notkun tölfræðiupplýsinga um jafnrétti kynjanna er lykilþáttur í því að stuðla að jafnrétti kynjanna í samfélaginu.

Í dag komu krakkar úr Vísindaskóla unga fólksins í heimsókn á Jafnréttisstofu. Hópurinn hafði fengið það verkefni að vinna frétt um starfsemi stofnana að Borgum á Akureyri. Því var kjörið að taka viðtal við framkvæmdastýru Jafnréttisstofu og spyrja hana um dagleg verkefni, hlutverk jafnréttislaga og ræða stuttlega um stöðu karla og kvenna á Íslandi.  Krakkarnir vinna síðan efnið úr viðtölum í þátt sem sýndur er í Vísindaskólandum. Tilgangur skólans er að veita krökkum tækifæri til að læra um málefni sem tengjast réttindum barna, heilsu, tækni, fjölmiðlum og umhverfismálum. Vísindaskólinn er nú starfræktur í annað sinn við Háskólann á Akureyri. 

Á kvenréttindadaginn þann 19. júní afhenti Eygló Harðardóttir, félags og húsnæðismálaráðherra styrki  úr Jafnréttissjóði Íslands. Tæplega 100 milljónir króna voru til úthlutunar úr sjóðnum sem stofnaður var í fyrra í tilefni af 100 ára afmæli kosningaréttar kvenna. Alls bárust 142 umsóknir en 42 umsækjendur hlutu styrk. Jafnréttisstofa var meðal þeirra sem hlutu styrk fyrir verkefnið „Rjúfum hefðirnar – förum nýjar leiðir“ sem miðar að því að vinna gegn neikvæðum staðalmyndum um hlutverk kvenna og karla í námi og starfi.  

Kvenréttindadagurinn 19. júní verður haldinn hátíðlegur í Reykjavík og á Akureyri.  Í Reykjavík verður lagður blómsveigur frá Reykvíkingum að leiði baráttukonunnar Bríetar Bjarnhéðinsdóttur klukkan 14:30. Að athöfn lokinni verður gengið að Hallveigarstöðum þar sem félög kvenna  bjóða til kaffisamsætis kl. 15:00. Í ár er fundurinn helgaður forsetakosningunum og eru gestir fundarins konur í framboði til embættis forseta Íslands. Á Akureyri hefst kvennasöguganga klukkan 11:00. Aað þessu sinni verður gengið  í fótspor kvenna sem settu svip á Brekkuna en lagt er af stað frá Lystsigarðinum.

Jafnréttisstofa birtir í dag fyrirlestur spænska lagaprófessorsins Ruth Rubio-Marín, í íslenskri þýðingu Ingunnar Sigríðar Árnadóttur, sem nú er að ljúka meistaraprófi í lögfræði.  Fyrirlesturinn var haldinn þann 6. maí síðastliðinn, sem inngangsræða á ráðstefnunni Konur í Evrópu og umheiminum (Women in Europe and in the World) og fjallar um birtingarmyndir kúgunar kvenna í Evrópu. Umræðan tekur sérstaklega fyrir ofbeldi gegn konum, misneytingu og jaðarsetningu, valdaleysi ásamt því að ræða tengsl jafnréttis og menningarlegrar heimsvaldastefnu.  Ruth Rubio-Maríon telur að umræða um jafnréttismál standi á tímamótum og segir að ef ekki verði tekist á við þau málefni sem tengjst lýðræði og stöðu kvenna, geti það haft alvarlegar afleiðingar á samfélagsþróun í Evrópu.  Fyrirlesturinn birtist nú í dag á fjölmörgum tungumálum, víða í Evrópu – enda athyglisvert innlegg í umræðu um stöðu kynjanna (Sjá: Hér)

Sunnudaginn 19. júní n.k. býður Jafnréttisstofa til kvennasögugöngu á Akureyri  í samstarfi við Héraðsskjalasafnið, Minjasafnið, Akureyrarbæ og  Zontaklúbbana á Akureyri. Gengið verður í fótspor kvenna sem settu svip á Brekkuna. Kristín Aðalsteinsdóttir prófessor leiðir gönguna sem hefst í Lystsigarðinum klukkan 11:00. Göngufólk mæti á flötina við Café Laut.

Samráðshópur um meðferð kynferðisbrota innan réttarvörslukerfisins sem innanríkisráðherra skipaði í mars 2016 hefur skilað ráðherra fyrstu tillögum um aðgerðir á þessu sviði. Hópnum var falið að kortleggja stöðu mála í dag, skilgreina styrkleika og tækifæri og leggja fram aðgerðaáætlun sem miði meðal annars að því að tryggja réttaröryggi, tryggja vandaða málsmeðferð og auka traust til réttarvörslukerfisins. Gert er ráð fyrir að samráðshópurinn starfi áfram að verkefninu og að fullmótuð aðgerðaráætlun verði tilbúin í haust.

Fjallað verður um undirbúning skýrslu um stöðu mannréttindamála á Íslandi á opnum fundi á vegum innanríkisráðuneytisins næstkomandi þriðjudag, 7. júní. Fundurinn fer fram í Iðnó í Reykjavík á milli klukkan 9 og 12, og er öllum opinn. Vinnuhópur á vegum innanríkisráðuneytis, mennta- og menningarmálaráðuneytis, velferðarráðuneytis, umhverfis- og auðlindaráðuneytis og utanríkisráðuneytis hefur að undanförnu unnið að skýrslu um stöðu mannréttindamála á Íslandi. Um er að ræða reglubundna athugun Sameinuðu þjóðanna á stöðu mannréttinda í svokölluðu Universal Periodic Review (UPR) og er þetta í annað skiptið sem slík athugun fer fram hér á landi en sú fyrsta fór fram árið 2011.

Finnland fer með formennsku í Norrænu ráðherranefndinni árið 2016. Aðal áherslan í formennskuáætlun Finnlands er á  vatn, náttúru og fólk. Í norræna samstarfinu um jafnréttismál leggur Finnland áherslu á að vinna gegn kynbundnu ofbeldi, stuðla að jafnrétti kynjanna í fjölmiðlum og kynjasjónarmið í heilsuvernd. Þessar áherslur eru í samræmi við samstarfsáætlun jafnréttisráðherranna 2015-2018 sem ber titilinn „Saman fyrir jafnrétti“. Finnarnir leggja jafnframt áherslu á þverfaglegt samstarf innan ráðherranefndarinnar.