Fréttir

Næstu fjóra mánudaga stendur jafnréttisnefnd Háskóla Íslands fyrir fyrirlestraröð um fjölskyldumál og jafnrétti. Í fyrirlestraröðinni verður fjallað um samtvinnun fjölskyldu- og jafnréttismála frá ýmsum sjónarhornum, og hvernig karlar og konur, stofnanir og fyrirtæki geta – og hafa – tekist á við þann vanda sem fylgir því að taka þátt í atvinnulífinu eða mennta sig, samhliða því að eiga og byggja upp gott fjölskyldulíf. M.a. verður horft til þeirra breytinga sem átt hafa sér stað að undanförnu í efnahags-, atvinnu- og menntamálum, og hvernig slíkar breytingar geta haft áhrif á fjölskyldulíf fólks.

Þróunarverkefnið Jafnréttisfræðsla í leik- og grunnskólum sótti um og fékk styrk frá Alcoa Fjarðaáli til að stuðla að jafnréttisfræðslu í Fjarðabyggð. Fyrsta skrefið var stigið nú í vikunni þegar Arnfríður Aðalsteinsdóttir verkefnisstjóri og Kristín Ástgeirsdóttir framkvæmdastýra Jafnréttisstofu heimsóttu Fjarðabyggð.

Stjórn Rannsóknasjóðs Rannís hefur úthlutað styrkjum úr nýrri markáætlun Vísinda- og tækniráðs. Um er að ræða stærstu styrki sem veittir hafa verið hér á landi og eru þeir allir til sjö ára. Meðal verkefnanna sem hlutu styrk að þessu sinni er Öndvegissetur í jafnréttis- og margbreytileikarannsóknum.

Á sama tíma og Jafnréttisráð fagnar jafnri kynjaskiptingu í ríkisstjórn og því að fyrsta konan gegni embætti forsætisráðherra, bendir það á hættur sem steðja að konum og körlum á vinnumarkaði og hvetur til þess að ástandið sem nú ríkir verði skoðað út frá hagsmunum beggja kynja. Ályktunin er hér birt í heild.

Ríkislögreglustjóri hefur gefið út jafnréttis- og framkvæmdaáætlun fyrir lögregluna og samkvæmt tilnefningu skipað henni sérstaka jafnréttisnefnd. Með þeirri skipan er tekinn upp nýr háttur í jafnréttismálum innan lögreglunnar þar sem ríkislögreglustjóri ber ábyrgð á framgangi jafnréttismála en lögreglustjórar bera ábyrgð á framgangi jafnréttisáætlunar, hver hjá sínu embætti.

Nú hefur tekið til starfa fyrsta ríkisstjórn Íslands sem stýrt er af konu og er við hæfi að sú ríkisstjórn sé skipuð körlum og konum til jafns. Jafnréttisstofa fagnar þessum tímamótum og óskar landsmönnum til hamingju með áfangann.

Í félags- og tryggingamálaráðuneyti er nú unnið að undirbúningi tillögu til þingsályktunar um framkvæmdaáætlun ríkisstjórnarinnar í jafnréttismálum eins og kynnt var á nýliðnu jafnréttisþingi. Fyrir þingið var lagt vinnuskjal, merkt umræðugrundvöllur, sem lýsti helstu áherslum í væntanlegri tillögu. Áhugasamir geta lagt sitt af mörkum við gerð tillögunnar og sent ráðuneytinu ábendingar á Netinu. Frestur til að skila inn ábendingum rennur út 10. febrúar.

Félagsvísindastofnun Háskóla Íslands hefur í samvinnu við félags- og tryggingamálaráðuneytið gefið út fræðirit á ensku um fæðingarorlof á Íslandi. Bókin sem heitir Equal Rights to Earn and Care – Parental Leave in Iceland var skrifuð í tilefni fundar sem haldinn var á Íslandi í október síðastliðnum um þetta efni.

Á undanförnum árum hafa iðulega risið deilur um að hve miklu leyti stjórnvöld geti sjálf ákveðið hvaða sjónarmið liggja til grundvallar ákvörðunum um val á milli umsækjenda um opinberar stöður. Í erindi sínu á Jafnréttistorgi mun Ástráður Haraldsson hrl. ræða um álitaefni sem þessu tengjast í ljósi dómafordæma og álita Umboðsmanns Alþingis.

Karlar eru enn við stjórnvölinn á Íslandi í mun ríkara mæli en konur, en hlutur kvenna fer þó vaxandi í ýmsum áhrifastöðum en stendur í stað eða minnkar í öðrum. Þetta kemur fram í Hagtíðindum, sem Hagstofan gefur út, um konur og karla í áhrifastöðum 2008.