Fréttir

Skaðlegar karlmennskuhugmyndir, klámvæðing og kvenfyrirlitning voru meðal þess sem rætt var á fræðslufundum um gerð jafnréttisáætlana sem Jafnréttisstofa og Jafnréttisskólinn í Reykjavík stóðu fyrir í öllum hverfum borgarinnar 7.- 9. apríl sl. Fundirnir voru liður í aðstoð við leik- og grunnskóla, frístundaheimili og frístundamiðstöðvar vegna vinnu við aðgerðabundnar jafnréttisáætlanir.

Næstkomandi föstudag munu Jafnréttisstofa og Félag kvenna í atvinnulífinu á Norðurlandi (FKA) standa fyrir málþingi um fjölbreytta og faglega forystu fyrirtækja á Hótel KEA. Málþingið er frá kl.12-14 og er öllum opið. Forystufólk úr norðlensku atvinnulífi er hvatt til að fjölmenna á málþingið og taka þátt í umræðum.

Meðal þess sem gera þarf til að fjölga körlum í kvennastéttum og konum í karlastéttum er að byrja strax á leikskóla að vinna með kynbundin viðhorf nemenda til starfa. Einnig þarf að efla kynjafræðiþekkingu kennara og auka skilning foreldra á mikilvægi jafnréttisuppeldis. Þetta kemur fram í grein Arnfríðar Aðalsteinsdóttur, sérfræðings á Jafnréttisstofu, þar sem hún spyr hvað gera þurfi til að jafna hlut kynjanna í námi á háskólastigi.

Eygló Harðardóttir ráðherra jafnréttismála veitti í gær, 20. mars, Samtökum kvenna af erlendum uppruna og Orkuveitu Reykjavíkur jafnréttisviðurkenningu Jafnréttisráðs. Viðurkenningar voru veittar í tveimur flokkum. Annarsvegar til fyrirtækis, sveitarfélags eða stofnunnar og hinsvegar til einstaklings, hóps eða félagasamtaka. Óvenju margar tilnefningar til jafnréttisviðurkenningarinnar bárust í ár og ljóst að víða í samfélaginu er unnið markvisst að auknu jafnrétti. Jafnréttisstofa óskar verðlaunahöfum til hamingju og vonar að verðlaunin verði öðrum hvatning. Við viðtöku verðlaunanna sagði Bjarni Bjarnason, forstjóri Orkuveitunnar, að mikilvægt væri að stjórnendur stofnana og fyrirtækja hefðu  aðstöðu og tækifæri til að framkvæma breytingar. Ekki væri nóg að lýsa stuðningi við jafnrétti, stjórnendur þyrftu að vinna að því á markvissan hátt.

Jafnréttisstofa gefur út bæklinginn Konur og karlar á Íslandi 2014 í samstarfi við við Hagstofu Íslands og velferðarráðuneytið. Í bæklingnum er að finna samantekt á helstu tölum og hlut kvenna og karla á ýmsum sviðum samfélagsins. Í bæklingnum eru meðal annars upplýsingar um stöðu kynjanna á vinnumarkaði, í menntakerfinu og í áhrifastöðum, ásamt upplýsingum um mannfjölda, fjölskyldur og fæðingarorlof. Bæklingurinn er einnig gefinn út á ensku. Hægt er að nálgast útgáfuna hér á heimasíðunni, á íslensku og ensku. Einnig er hægt að panta eintök með því að senda póst til Jafnréttisstofu.

Eygló Harðardóttir húsnæðis- og félagsmálaráðherra mun afhenda jafnréttisviðurkenningu Jafnréttisráðs í Hannesarholti á morgun fimmtudaginn 20. mars kl. 16. Viðurkenningu geta þeir aðilar hlotið sem á einn eða annan hátt hafa skarað fram úr eða markað spor á sviði jafnréttismála. Í ár eru viðurkenningar veittar í tveimur flokkum. Ein til fyrirtækis, sveitarfélags eða stofnunnar og önnur til einstaklings, hóps eða félagasamtaka. Nánari upplýsingar veitir Bryndís Valdemarsdóttir

Þriðjungur kvenna í löndum Evrópusambandsins hefur orðið fyrir líkamlegu eða kynferðislegu ofbeldi eða hvoru tveggja. Þetta staðfestir rannsókn Evrópustofnunar grundvallarmannréttinda (FRA - The European Union Agency for Fundamental Rights), sem kynnt var í Brussel þann 6. mars sl.

Á fjölmennum fundi sem Zontaklúbbarnir á Akureyri og Jafnréttisstofa stóðu fyrir á alþjóðlegum baráttudegi kvenna 8. mars sl. var eftirfarandi ályktun samþykkt: • Fundurinn skorar á á Illuga Gunnarsson, menntamálaráðherra að tryggja að lögum um jafnréttisfræðslu á öllum skólastigum sé framfylgt. • Fundurinn skorar á Sýslumanninn á Akureyri og Akureyrarbæ að taka upp verklag lögreglunnar á Suðurnesjum og félagsþjónustunnar í heimilisofbeldismálum. • Fundurinn hvetur alla karla til að láta til sín taka í baráttunni fyrir jafnrétti kynjanna og uppræta ofbeldi gegn konum sem viðgengst í íslensku samfélagi eins og annars staðar. Ofbeldi gegn konum á aldrei að líðast en það er ein hindrunin fyrir því að kynin standi jafnt að vígi í samfélaginu. Árangur næst ekki nema allir, karlar og konur, taki höndum saman.

Í tilefni af alþjóðlegum baráttudegi kvenna laugardaginn 8. mars verður boðið upp á spennandi viðburði í Reykjavík og á Akureyri. Jafnréttisstofa hvetur alla til að kynna sér og taka þátt í viðburðum dagsins. 

Krakkar á Akureyri taka öskudaginn jafnan snemma og á Jafnréttisstofu mátti sjá sérkennilega klædd börn syngjandi og trallandi fram eftir morgni. Krakkarnir voru himinlifandi með að fá epli að launum fyrir sönginn. Hér að neðan gefur að líta myndir af nokkrum krökkum sem lögðu leið sína til okkar.  Jafnréttisstofa þakkar kærlega fyrir sig!!