Fréttir

Samstarfshópur norrænna og baltneskra samtaka sem vinna gegn mansali hefur opnað heimasíðu. Síðan er hugsuð sem vettvangur til að nálgast upplýsinga um mansal og til þess að efla tengsl í baráttunni gegn mansali.

Jafnréttisstofa vill benda á þrjá áhugaverða fyrirlestra í vikunni. Á fimmtudaginn flytur Arnar Gíslason fyrirlestur um karla og fóstureyðingar og dr. Yvonne Fulbright fjallar um kynfræðslu íslenskra mæðra. Á föstudaginn flytur svo Gyða Margrét Pétursdóttir erindið Skreppur og Pollýanna.

Stofnfundur Femínistafélags Háskóla Íslands verður haldinn í dag, föstudaginn 21. september, kl. 12 á hádegi í Odda. Tilgangur félagsins er að upplýsa stúdenta og samfélagið um femínisma með því að fjalla um hann á fræðilegum grundvelli. Einnig mun félagið sjá um að halda fyrirlestra og námskeið um jafnrétti kynjanna.

Undanfarna daga hafa verið birtar niðurstöður nokkra kjararannsókna þar sem kynbundinn launamunur var sérstaklega skoðaður. Jafnréttisstofa hefur nú tekið saman stutt yfirlit yfir þær kannanir og fundið slóðir á ítarlegri niðurstöður.

Félagsmálaráðherra, Jóhanna Sigurðardóttir, kynnti í ríkisstjórn í morgun ákvarðanir sínar og fjármálaráðherra um að skipa þrjá starfshópa til að fylgja eftir markmiðum er fram koma í stefnuyfirlýsingu ríkisstjórnarinnar frá 23. maí sl. á sviði jafnréttismála. Þar er megináhersla lögð á að unnið verði markvisst gegn kynbundnum launamun og að endurmat fari fram á kjörum kvenna hjá hinu opinbera.

Ingólfur V. Gíslason, sviðsstjóri Jafnréttisstofu, mun halda fyrirlestur á vegum Rannsóknastofu í kvenna- og kynjafræðum fimmtudaginn 13. september kl.12:00 í Hátíðasal Háskóla Íslands, aðalbyggingu.

Norræna rannsóknarsetrið í kvenna- og kynjafræðum NIKK í samstarfi við Rannsóknarstofnun vinnumála í Noregi (AFI) rannsakar sýn karla á jafnrétti. Rannsóknin sem hefur samnorræna skírskotun á að skoða sérstaklega afstöðu karla til jafnréttis og hvernig þeir sjá sitt hlutverks í að skapa réttlátt samfélag.

Femínistafélag Íslands heldur fyrsta Hitt vetrarins þriðjudaginn 11. september næstkomandi kl. 20 á Bertelstofu Thorvaldsen bars. Þar munu Jóhanna Sigurðardóttir félagsmálaráðherra og Kristín Ástgeirsdóttir, nýskipuð framkvæmdastýra Jafnréttisstofu halda stutt erindi.

Í síðustu viku var haldin ráðstefna sem bar heitið Karlar til ábyrgðar. Var hún haldin til að vekja athygli á mikilvægi þess að karlmenn sem beita ofbeldi í nánum samböndum fái aðstoð við að losna úr viðjum ofbeldisbeitingar. Karlar til ábyrgðar er eina sérhæfða meðferðaúrræðið hér á landi fyrir karla sem beita ofbeldi á heimilum. Þessa viku verður haldið áfram að vekja athygli á þessu úrræði og símanúmeri þess með auglýsingum og dreifingu upplýsingabæklings.

Í gær tók Kristín Ástgeirsdóttir formlega við lyklavöldum á Jafnréttisstofu úr höndum Inga Vals Jóhannssonar, sem gegnt hefur stöðu framkvæmdastjóra frá 1. júlí sl.