Fréttir

Jafnréttisráð auglýsir styrk til meistaranema til að vinna lokaverkefni um hefndarklám, þ.e. kynferðislegt efni sem miðlað er á netinu án samþykkis þess sem sést á myndinni. 

Embla Guðrúnar Ágústsdóttir verkefnastýra hjá Tabú heimsótti Akureyri laugardaginn 6. desember og hélt áhugavert erindi á Amtsbókasafninu þar sem hún fjallaði um ofbeldi gegn fötluðum konum. Meðal þess sem fram kom í máli Emblu, og vakti sérstaka athygli áheyrenda, var að enn í dag eru fatlaðar konur gerðar ófrjóar án þeirra samþykkis.

Í dag átti að fara fram friðarkaffi og ljóðalestur á Kaffi Ilmi kl. 17, í tengslum við 16 daga átak gegn kynbundnu ofbeldi. Nú er veður með versta móti á Akureyri og því hefur verið ákveðið að aflýsa viðburðinum.

Um áttatíu manns sóttu í liðinni viku námskeið um forvarnir og aðgerðir gegn heimilisofbeldi sem Jafnréttisstofa stóð fyrir í samstarfi við samstarfsteymi vegna heimilisofbeldis. Tilgangur námskeiðsins var að miðla þekkingu sem skapast hefur á Suðurnesjum í tengslum við verkefnið Að halda glugganum opnum. 

Fimmtudaginn 4. desember síðastliðinn kynnti Hjálmar Sigmarsson hluta lokaverkefnis síns, til meistaraprófs við Central European University í Búdapest, í nýjum húsakynnum Stígamóta að Laugarvegi 170. Rannsóknin fjallar um hlut karla í jafnréttismálum á Íslandi en í erindinu lagði hann sérstaka áherslu á hlutverk karla í baráttu gegn kynferðisofbeldi.

Þann 4. desember, frá kl. 8:15 – 10:00, verður haldinn morgunverðarfundur í nýju húsnæði Stígamóta að Laugavegi 170. Á fundinum verður rætt um hlutverk karla í baráttunni gegn ofbeldi.  Hjálmar Gunnar Sigmarsson mun kynna niðurstöður úr nýlegri MA rannsókn sinni í kynjafræði, þar sem hann skoðaði reynslu ungra íslenskra karl-femínista. Í rannsókninni, sem byggði á djúpviðtölum, lögðu viðmælendur Hjálmars meðal annars áherslu á mikilvægi umræðunnar um kynferðisofbeldi gegn konum.

Í grein sem Kristín Ástgeirsdóttir framkvæmdastýra Jafnréttisstofu skrifar í Fréttablaðið þann 6. desember síðastliðinn skorar hún á stjórnvöld að ljúka nauðsynlegum aðgerðum til að fullgilda Istanbúlsamninginn. Samningurinn, sem kenndur er við borgina Istanbúl, kveður meðal annars á um réttindi brotaþola og skyldur ríkja til að kveða niður og fyrirbyggja ýmiss form ofbeldis gegn konum. Þá fjallar samningurinn einnig um nauðsynlegar ráðstafanir varðandi fræðslu fyrir almenning, stjórnvöld og fagaðila. Á Íslandi er ekki í gildi heildstæð aðgerðaáætlun gegn kynbundnu ofbeldi. Fyrsta aðgerðaáætlunin sem var samþykkt rann út árið 2011.

Fimmtudaginn 4. desember verður haldinn morgunverðarfundur á Grand hótel Reykjavík um hlut karla og kvenna í stjórnum fyrirtækja. Í mars árið 2010 voru samþykkt lög á Íslandi um lágmark 40% hvors kyns í stjórnum fyrirtækja með fleiri en 50 starfsmenn á ársgrundvelli.Lögin tóku strax gildi hjá opinberum hlutafélögum. Hlutafélögum, einkahlutafélögum og samlagshlutafélögum var gefinn aðlögunartími til 1. september 2013. Það þýðir að í dag er rúmt ár frá fullri innleiðingu laganna. 

Mikið var um að vera á Akureyri í gær við upphaf 16 daga átaks gegn kynbundnu ofbeldi. Fjölmenni var í ljósagöngu sem gengin var frá Akureyrarkirkju niður að Ráðhústorgi þar sem göngufólk myndaði friðarhring. Að lokum var boðið í bíó á kvikmyndina Girl rising. Í myndinni er skyggnst inn í líf níu stúlkna sem eiga það sameiginlegt að búa við ofbeldi og fátækt. Myndin sýnir hvernig menntun getur rofið vítahring ofbeldis og fátæktar.

Í dag 25. nóvember er alþjóðlegur baráttudagur gegn kynbundnu ofbeldi og vill Jafnréttisstofa því minna sérstaklega á nokkra viðburði 16 daga átaksins í dag. Gengin verður ljósaganga frá Akureyrarkirkju, myndaður ljósaspírall á Klambratúni og Stígamót standa fyrir stuttmyndasýningu í nýju húsnæði samtakanna.