Fréttir

Í lögum um jafna stöðu og jafnan rétt kvenna og karla nr. 10/2008 er kveðið á um í 1. gr. að unnið skuli að jafnrétti kynjanna hér á landi með því að beita kynjasamþættingu. Kynjasamþætting felur í sér að spurt sé ákveðinna spurninga og ákveðinni aðferðafræði beitt við alla ákvarðanatöku og stefnumótun, hvort sem um er að ræða stjórnvöld eða atvinnulíf. Samkvæmt 18. gr. laganna er stofnunum og fyrirtækjum þar sem starfa fleiri en 25 starfsmenn skylt að setja sér jafnréttisáætlun þar sem réttindi starfsmanna skv. 19.-22. gr. laganna skulu tryggð. Bæklingnum er því ætlað að kynna ávinning kynjasamþættingar fyrir stofnanir og fyrirtæki jafnframt því að reynast nothæft tæki við gerð jafnréttisáætlana.

Jafnréttisstofa hefur gefið út handbókina Jöfnum leikinn en hún fjallar um kynjasamþættingu. 

Félags- og húsnæðismálaráðherra hefur gert samkomulag við Rannsóknarsetur í fötlunarfræðum um að setrið annist útgáfu og dreifingu á kynningarefni um ofbeldi gegn fötluðum konum og hvert fatlaðar konur geti sótt stuðning hafi þær sætt ofbeldi. Til verkefnisins verður varið 1,8 milljónum króna.

Um sjötíu manns sóttu málþing um aðgerðir gegn ofbeldi í nánum samböndum, heimilisofbeldi og kynferðisofbeldi og afleiðingar þess á landsbyggðunum. Málþingið var haldið á Akureyri þann 4. desember sl. en var einnig sent út netinu.

Þann 25. nóvember hefst alþjóðlegt 16 daga átak gegn kynbundnu ofbeldi, átak sem rekja má allt aftur til ársins 1991. Dagsetning átaksins var valin til að tengja saman á táknrænan hátt kynbundið ofbeldi og mannréttindi. Átakið hefst á alþjóðlegum baráttudegi gegn ofbeldi gegn konum og því lýkur 10. desember á hinum alþjóðlega mannréttindadegi. Markmið átaksins er að knýja á um afnám alls kynbundins ofbeldis.

Á sjávarútvegsráðstefnunni sem haldin var í Reykjavík 19.-20 nóvember var málstofa undir yfirskriftinni „Af hverju eru ekki fleiri konur í stjórnunarstöðum í sjávarútvegi?“. Frummælendur voru dr. Þóranna Jónsdóttir sviðsstjóri viðskiptasviðs HR, Kristín Ástgeirsdóttir Jafnréttisstofu, Guðrún Anna Finnbogadóttir sjávarútvegsfræðingur, Marie Christine Monfort sem unnið hefur um árabil í sjávarútvegi og Hilmar Hjaltason frá Capacent. Þetta er í fyrsta sinn sem kynjajafnrétti er rætt á þessum viðamikla vettvangi sjávarútvegsins. 

Á nýafstöðnu jafnréttisþingi sem fram fór 25. nóvember sl. var megin áhersla lögð á stöðu kvenna og kynjaðar birtingarmyndir á opinberum vettvangi en markmiðið var að varpa ljósi á ólíka stöðu kynjanna í fjölmiðlum og kvikmyndum annars vegar og hins vegar að fjalla um hatursorðræðu.

Föstudaginn 4. desember verður haldið opið málþing á Akureyri um aðgerðir gegn ofbeldi í nánum samböndum, heimilisofbeldi og kynferðisofbeldi og afleiðingar þess á landsbyggðunum. Málþingið sem stendur frá 12:45 til 16:30 er haldið að Borgum við Norðurslóð á Akureyri í tengslum við 16 daga alþjóðlegt átak gegn kynbundnu ofbeldi. 

Á föstudaginn var einn af bestu dögum ársins á Stígamótum. Starfsfólk afhenti Stígamótaviðurkenningarnar í áttunda sinn. Viðurkenningarhafar hafa alllir lagt til mikilsverðan skerf í baráttunni fyrir réttlæti og gegn kynferðisofbeldi. Í ár voru eftirfarandi aðilar heiðrarðir: Þakklætisviðurkenning Stígamóta 2015 Halldóra Halldórsdóttir Hugrekkisviðurkenning Stígamóta 2015 Kristín Jóna Þórarinsdóttir Hugrekkisviðurkenning Stígamóta 2015 Hanna Þorvaldsdóttir Réttlætisviðurkenning Stígamóta 2015 Alma Ómarsdóttir  Sannleiksviðurkenning Stígamóta 2015 Kamila Modzelewska Sannleiksviðurkenning Stígamóta 2015 Ásdís Viðarsdóttir  Réttlætisviðurkenning Stígamóta 2015 Elsku stelpur Vinningsatriði Hagaskóla í Skrekk 2015 Frelsisviðurkenning Stígamóta 2015 Free the nipple á Íslandi Sýnileikaviðurkenning Stígamóta 2015 Framlag til Beauty Tips byltingarinnar Grasrótarviðurkenning Stígamóta 2015 Brynhildur Yrsa Valkyrja Guðmundsdóttir Fjölmiðlaviðurkenning Stígamóta 2015 Hæpið

Fjallað er um stöðu karla og kvenna á öllum helstu sviðum samfélagsins í skýrslu félags- og húsnæðismálaráðherra sem lögum samkvæmt er lögð fram á jafnréttisþingi. Þar er einnig fjallað um stöðu verkefna samkvæmt framkvæmdaáætlun stjórnvalda í jafnréttismálum til ársins 2014.  Skýrslan spannar að venju vítt svið en þess má geta að í tilefni af 100 ára afmælisári kosningaréttar íslenskra kvenna er í inngangi hennar fjallað sérstaklega um völd og áhrif karla og kvenna í samfélaginu, á vinnumarkaði, í stjórnmálum og efnahagslífi.