Fréttir

Ríkisstjórn Ísland samþykkti innleiðingaráætlun um kynjaða hagstjórn og fjárlagagerð fyrir árin 2015 til 2019, á fundi sínum þann 19. júní síðastliðinn.  Í jafnréttislögum, lögum nr. 10/2008, segir að við alla stefnumótun og áætlanagerð á vegum ráðuneyta og opinberra stofnanna skuli kynjasamþættingar gætt. Innleiðing kynjaðrar hagstjórnar og fjárlagagerðar (KHF) hófst á Íslandi árið 2009 og byggir á aðferðafræði kynjasamþættingar.

Jafnréttisstofa verður lokuð frá hádegi föstudaginn 19. júní, í tilefni af 100 ára afmæli kosningaréttar íslenskra kvenna. Jafnréttisstofa hvetur landsmenn alla til að halda daginn hátíðlegan og minnir á að viðburðir eru skipulagðir víða um land í dag.  Yfirlit viðburða má finna hér

Fimmtudaginn 18. júní verður kvennasöguganga á Akureyri.  Í ár verður gengið í fótspor Vilhemínu Lever. Vilhelmína er þekkt fyrir að hafa greitt atkvæði í fyrstu bæjarstjórnarkosningunum á Akureyri árið 1863. Gangan hefst við Laxdalshús, Hafnarstræti 11, kl. 20.00 og endar á Minjasafninu þar sem gestum er boðið á sýninguna „Ertu tilbúin frú forseti?“ um Vigdísi Finnbogadóttur, fyrsta lýðræðislega kjörna kvenforseta í heiminum. Hanna Rósa Sveinsdóttir safnvörður á Minjasafninu leiðir gönguna.

Á ráðstefnunni Fjölbreytt forysta í atvinnulífinu sem haldin var af Jafnréttisstofu í maí sl. voru tvær íslenskar rannsóknir á stjórnarháttum, viðhorfum stjórnarmanna og vali á stjórnarmönnum á tímum kynjakvóta kynntar. Jafnréttisstofa hefur nú fengið í hendur skýrslur um niðurstöður rannsóknanna sem hægt er að lesa hér að neðan.

Aðgerðahópur stjórnvalda og samtaka aðila vinnumarkaðarins um launajafnrétti hefur kynnt niðurstöður rannsóknarverkefna hópsins. Annars vegar er um að ræða fyrstu rannsókn, sem gerð hefur verið hér á landi á kynbundnum launamun, sem tekur til vinnumarkaðarins í heild og hins vegar rannsóknarskýrslu um stöðu kvenna og karla á vinnumarkaði.

Í dag fer fram ráðstefnan Fjölbreytt forysta, sem Jafnréttisstofa stendur að í samstarfi við Atvinnuvega- og nýsköpunarráðuneytið, Kauphöllina, Háskóla Íslands og Háskólann í Reykjavík. Á ráðstefnunni er fjallað um niðurstöður rannsókna um konur og karla sem stjórnendur og stjórnarfólk í fyrirtækjum. Á ráðstefnunni fjallar Dr. Þorgerður Einarsdóttir, kynjafræðingur um niðurstöður rannsóknarskýrslunnar Konur og karlar í forystu atvinnulífs á Íslandi. 

Jafnréttisstofa í samstarfi við Atvinnuvega- og nýsköpunarráðuneytið, Kauphöllina, Háskóla Íslands og Háskólann í Reykjavík skipuleggur nú alþjóðlega ráðstefnu um fjölbreytta forystu í atvinnulífinu. Ráðstefnan veitir fólki í viðskiptalífinu, fræðimönnum og sérfræðingum tækifæri til að ræða gildi fjölbreyttrar forystu þegar kemur að ákvarðanatöku, rekstri og vinnumenningu fyrirtækja.

Miðvikudaginn 20. maí efnir aðgerðahópur um launajafnrétti til morgunverðafundar á Grand Hótel Reykjavík. Á dagskrá fundarins er kynning á niðurstöðum rannsóknar um kynbundinn launamun og skýrslu um stöðu kvenna og karla á vinnumarkaði. Aðgerðahópur um launajafnrétti var skipaður árið 2012. Verkefni aðgerðahópsins eru meðal annars að samræma rannsóknir um kynbundinn launamun og annast kynningu og fræðslu um innleiðingu jafnlaunastaðals. Nánar um dagskrá og skráningu hér.

Jafnréttisstofa og Heilbrigðisvísindasvið Háskólans á Akureyri halda ráðstefnu þann 26. maí nk.um heilbrigði kvenna í tilefni af 100 ára afmæli kosningaréttar kvenna. Ráðstefnan er öllum opin en hún fer fram í stofu M101 í HA frá kl. 9 .00-17.00. 

Styrkjum til atvinnumála kvenna var úthlutað við hátíðlega athöfn í Bláa lóninu þann 30. apríl síðastliðinn.  Alls fengu 33 verkefni styrki að heildarupphæð kr. 35 milljónir.  Sjóðnum bárust 239 umsóknir sem ráðgjafarnefnd hefur metið á undanförnum vikum. Ingibjörg Elíasdóttir, lögfræðingur á Jafnréttisstofu, á sæti í ráðgjafanefndinni en nefndin er einnig skipuð fulltrúum frá velferðarráðuneyti, Vinnumálastofnun og Byggðastofnun. Eygló Harðardóttir, félags- og húsnæðismálaráðherra, afhenti styrkina í ár.