Fréttir

Í dag tekur Katrín Björg Ríkarðsdóttir formlega við starfi framkvæmdastjóra Jafnréttisstofu. Katrín Björg lauk M.Ed gráðu í menntunarfræðum með áherslu á kynjajafnrétti frá Háskólanum á Akureyri árið 2011. Áður hafði hún lokið menntun í uppeldis- og kennslufræðum frá sama skóla árið 1996 og BA prófi í sagnfræði frá Háskóla Íslands árið 1992.

Háskólinn á Akureyri og Jafnréttisstofa efna til þjóðfundar föstudaginn 1. desember með nemendum í 10. bekk grunnskólanna á Akureyri. Alls munu um 160 nemendur taka þátt. Umræðuefnið að þessu sinni er jafnrétti sem er einn af grunnþáttum menntunar. Auk nemenda munu kennarar og nemendur HA taka þátt.

Drífa Snædal, framkvæmdastjóri Starfsgreinasambands Íslands verður með hádegisfyrirlestur á Jafnréttisstofu í dag kl. 12:00. Þar mun Drífa fjalla um kynbundna og kynferðislega áreitni á vinnumarkaði og velta fyrir sér hvaða áhrif slíkt ofbeldi á vinnustað hefur á laun, framgang og stöðu einstaklinga á vinnumarkaði.

Dagskrá 16 daga átaksins á Akureyri er komin í loftið. Upphafsdagurinn 25. nóvember er alþjóðlegur baráttudagur gegn ofbeldi gegn konum. Lokadagurinn 10. desember er alþjóðlegi mannréttindadagurinn. Dagsetningarnar tengja saman á táknrænan hátt ofbeldi og mannréttindi.

Endurmenntun Háskóla Íslands í samstarfi við velferðarráðuneytið stendur fyrir þriggja daga námskeiði um vottun jafnlaunakerfa í desember. Skráning er hafin.

Velferðarráðuneytið og Staðlaráð Íslands hafa gert með sér samstarfssamning sem tryggir almennan aðgang að Jafnlaunastaðlinum ÍST 85. Með samningnum er brugðist við áliti allsherjar- og menntamálanefndar Alþingis í aðdraganda lagasetningar um skyldu til vottunar jafnlaunakerfa.

Hvergi í heiminum mælist meiri jöfnuður milli kynjanna en á Íslandi samkvæmt mælingum Alþjóðaefnahagsráðsins árið 2017 og trónir Ísland í efsta sæti 9. árið í röð. Í kynningu á niðurstöðunum er sérstaklega fjallað um hvað ræður góðri frammistöðu Íslendinga á þessu sviði.

Hjördís Sigursteinsdóttir, aðjúnkt við Háskólann á Akureyri var með áhugavert erindi í málstofu Viðskiptafræðideildar sl. föstudag þar sem hún fjallaði um einelti og kynbundið ofbeldi á vinnustað. Hjördís kynnti niðurstöður rannsókna á þessu sviði og sagði mikilvægt að auka umræðu um vinnutengt ofbeldi.

Í dag afhenti Þorsteinn Víglundsson, félags- og jafnréttismálaráðherra, jafnréttisviðurkenningu Jafnréttisráðs við hátíðlega athöfn í Hannesarholti. Í þetta sinn voru það tveir aðilar sem hlutu viðurkenninguna en báðir aðilar hafa skarað fram úr á sviði jafnréttismála þó á mjög ólíkan hátt. Þetta eru Hafnarfjarðarbær og Druslugangan.

Jafnréttisstofa hélt þéttsetna ráðstefnu um samvinnu í heimilisofbeldismálum og ljóst að áhugi er mikill á að takast á við heimilisofbeldismál á þverfaglegum grunni. Ráðstefnan er hluti af verkefni Jafnréttisstofu Byggjum brýr – brjótum múra sem styrkt er af ESB. Þátttakendur ráðstefnunnar komu frá öllum landsfjórðungum og úr ýmsum geirum samfélagsins. Nú eru glærur fyrirlesara aðgengilegar.